Þeir riðu á kjörstað í gamla daga en ég fór á Vespunni. Já, pabbi minn fékk þá snilldarhugmynd að kaupa sér vespu um daginn sem maður er búinn að snattast á hingað og þangað síðan. Systir mín fékk svo próf á hana í dag þannig að það er spurning hvað ég fæ hana mikið lánaða núna.

Annars er líklegt að ég fari að selja hitt farartækið mitt, rauðan fólksvagn Gólf með fastanúmerið DU-387. Umsóknarferlið um skólavist úti skotgengur og jafnvel eru íbúðarmálin í höfn. Það er óþarfi að eiga bíl þegar maður hefur lestarnar í Köben.

Skilaði síðustu tveimur verkefnunum í gær og lauk þar með þriðja árinu i háskóla. Ætla ekki að gera neitt í dag nema kjósa ... svo sjáum við til hvað gerist í kvöld!

Ef þið þurfuð að ná í mig og ég svara ekki í síma eða kem ekki til dyra þá er ég í þessum snilldar leik!

Blíðan undanfarna daga hefur orðið þess valdandi að maður þarf að keyra um með galopinn gluggann. Ég verð alltaf skíthræddur þegar ég er með galopinn gluggann að keyra að það fljúgi randaflugur eða fuglar (eru randaflugur ekki fuglar?) inní bíl og það verði eitthvað tragedí!

Félagsvísindastofnun Háskóla Íslands hringdi í mig kl. 17.00 og spurði hvað ég ætlaði að kjósa í næstu sveitarstjórnarkosningum. Gallup hringdi kl. 18.00 og spurði hvað ég ætlaði að kjósa í næstu sveitarstjórnarkosningum og hvað heimilið væri með miklar tekjur á ári. Það var ekkert búið að breytast hvað ég ætlaði að kjósa en ég sagði pass við seinni spurningunni.

Manchester tónleikar Icelandair voru spes. Þegar maður mætti voru þetta ekki tónleikar lengur heldur tónlistarhátíð til TÓLF! Sem betur fer fékk maður armband svo maður gat valsað inn og út. Stúkan var lokuð, hefði brjálast hefði ég borgað fullt verð fyrir að sitja á bekkjunum aftast. Svo dróst þetta allt saman og við vorum komin heim kl. 2.

Til eru fræ með Benna Hemm Hemm var án efa lag kvöldsins - frekar geggjað hjá þeim. Badly Drawn Boy var samt bestur. Hefðum varla getað verið nær, nema bara á sviðinu. Við Begga söknuðum þess samt að heyra ekki lagið Exit stage right úr About a Boy ... Hann hefði alveg getað skotið því inn á milli laga, ég meina það er bara 21 sekúnda.

Pabbi minn fékk þá snilldar hugmynd að kaupa sér Vespu. Mesta snilldin er samt að ég get fengið vespuna lánaða!

Hvað ætlar þú að gera kl. 01:02:03, 04.05.06?

Horfðu á þetta vídjó og þú þarft aldrei að skralla framar!

Einnig hrærðu almennilegt kakó, brjóttu saman bol á mettíma og hafðu plásturinn á allan daginn!

Þið afsakið að þetta er flest á japönsku ... en margir góðir hlutir koma frá Japan. T.d. Sony!

Guðmundur Heiðar Frímannsson er bara fyndinn í siðfræðibókinni minni þegar hann skrifar um sjálfræði.

"Það er augljóst að, að fiðlunám mitt getur valdið öðrum, sem umgangast mig daglega, verulegum óþægindum. En hugmyndin er þá sú, að öðrum beri að umbera þessi óþægindi, fremur en þeir neyði mig til að hætta, og heitir á mætu máli tillitsemi."

Annars fer ég alltaf að hugsa um eitthvað allt annað en prófið sem ég er að fara í. Ég er t.d. búinn að skipuleggja í þaula hvernig ég ætla að taka til í fataskápnum mínum eftir próf ...