Námskeið fer fram í versluninni Frú Bóthildi að Síðumúla 35,
dagana 14. og 28. apríl.
Kennsla hefst klukkan 19:00 og lýkur klukkan 22:00

Námskeiðið kostar kr. 9.500,-
Þar af er óafturkræft skráningargjald kr. 3.000,-
Skráning fer fram í versluninni Frú Bóthildur, sími 55 33 770

Um námskeiðið:

Bútakúnst er samtímaleg þróun út frá aðferðum hefðbundins bútasaums. Þar er unnið eftir eigin hönnun með blandaðri tækni í frjálsum formum í stað fastmótaðra mynstra kynslóðanna.

Á þessu námskeiði verður unnið að því að virkja sköpunargáfuna og efnisgera - bókstaflega - þær myndir sem hún málar í huga okkar.

Námskeiðið verður í formi fyrirlestra með skýringamyndum og sýnishornum, hópvinnu og umræðum ásamt persónulegri leiðsögn.

Gerðar verða ýmsar æfingar til að þjálfa huga og hönd, ýmist í taui eða pappír. Unnið verður að mörgum æfingastykkjum sem verður ekki endilega lokið á námskeiðinu. Ýmis heimaverkefni verða unnin á milli tímanna og stuðst verður við úrlausnir þeirra í seinni tímanum.

Nemendur setja saman sína eigin vinnubók sem gæti orðið uppáhaldsbókin þeirra og ómetanlegt uppflettirit með tíð og tíma!

Hæfniskröfur fyrir nemendur:

Til að geta tekið þátt í námskeiðinu þarftu að kunna vel á saumavélina sem þú ætlar að nota í tímunum. Þú þarft líka að kunna að nota skurðarhníf og skurðarstiku eins og notuð eru í hefðbundnum bútasaumi. Það verður ekki kennt á saumavélar og heldur ekki skurðarhnífa.

Það er algjör krafa að þú sért til í að prófa eitthvað sem þú hefur ekki gert áður. Þú verður að vera fús til að reyna að gera eitthvað öðru vísi en áður, ef þörf krefur. Og jafnvel bara "af því bara".

Þú þarft ekki að kunna bútasaum.
Þú þarft ekki að geta teiknað.
Þú þarft ekki að hafa "þroskað" litaskyn.
Listhneigð og hugmyndaauðgi eru ekki skilyrði.

Hins vegar er óviðráðanlega löngun til að vekja sálina og næra hana gott vegarnesti. Þú þarft að voga þér að láta þig dreyma, upphátt og í hljóði, láta feimni þína og fælni þér í léttu rúmi liggja, rétt sem snöggvast, og láta vaða!

Bútakúnst gæti einmitt verið sá persónulegi tjáningarmiðill sem hentar þér.

Efnis- og áhaldalisti:
(áætlun)

• Taurestar í mörgum litum, bæði einlit og mynstruð efni, og af ýmsu tagi
• Alls kyns saumavélartvinni og garnrestar
• Þunnt bómullarvatt, a.m.k. ½m (uppl. hjá Frú Bóthildi)
• Skörp tauskæri og lipur pappírsskæri,
• Skurðarhnífur, skurðarstika og skurðarmotta
• Blýantur, strokleður, yddari, reglustika
• A4 pappír, óstrikaður (u.þ.b. 20 arkir)
• Tímarit/myndabæklingar sem má klippa
• Límstifti fyrir pappír (alls ekki fljótandi lím)
• Saumavél í fullkomnu lagi (ekki ókunnuga vél)
• Títuprjónar
• Saumavélarnálar
• Metal saumavélarnálar
• Plastvasa og teygjumöppu fyrir verkefni

Nákvæmur efnislisti verður sendur skráðum þátttakendum er nær dregur námskeiði.