Agnar hóf tónlistarnám sitt sex ára gamall við Tónlistarskóla Hafnarfjarðar þar sem hann lagði fyrst stund á orgelleik en síðar píanó. Sextán ára lá leið hans í tónlistarskóla FÍH (Félag Íslenskra Hljómlistar-manna) þar sem hann lauk prófi í djasspíanóleik með ágætiseinkunn. Í beinu framhaldi fluttist Agnar til Hollands þar sem hann lauk háskólaprófi í djasspíanóleik og kennslu. Um þær mundir tók Agnar þátt í tónleikum á vegum skólans sem leiddu til kynna hans við virtan bandarískan djasspíanista Larry Goldings. Goldings bauð Agnari að nema hjá sér í New York, sem hann gerði. Í New York komst Agnar í kynni við fleiri þekkta tónlistarmenn á sviði djassins en þau kynni leiddu m.a. til útgáfu fyrsta geisladisks hans sem ber nafnið 01. Núll einn var gefinn út og honum dreift víða um heim af spænska plötufyrirtækinu Fresh Sound- New Talent. Sá diskur var tilnefndur til Íslensku tónlistarverðlaunanna 2001. Frá því þá hefur Agnar ásamt öðrum tónlistarmönnum gefið af sér tvo geisladiska til viðbótar. Þeir eru Tónn í tómið, flygladúett ásamt Ástvaldi Traustasyni og Fals, B3 orgeltríó. Geisladiskurinn Fals hefur fengið 4 tilnefningar til Íslensku tónlistarverðlaunanna 2003. Þar af hlaut Agnar eina af tilnefningunum fyrir besta djasslag ársins 2003.

Auk þessa hefur Agnar á tónlistarferli sínum unnið til verðlauna svo sem „Outstanding Musicianship Award“ frá Berklee tónlistarháksólanum í Boston og komist í undanúrslit í Alþjóðlegu djass-píanókeppninni Martial Solal í París haustið 2002. Hann hefur útsett lög fyrir geislaplötur og söngleiki, starfað með Stórsveit Reykjavíkur í mörg ár, leikið á tónleikum hérlendis sem erlendis, verið píanóleikari og annast tónlistarstjórn í leikhúsi. Agnar starfar nú sem djasspíanisti en kennir jafnframt píanóleik við djassdeild Tónlistarskóla FÍH.