Friendship Tapestry

Fréttir/Dagbók

Ég er með tvö blogg, annað á ensku hér og hitt á íslensku hér. Ef þið viljið kíkja og jafnvel skilja eftir komment, gjörið svo vel og verið velkomin. :-)
Þessi blogg eiga vonandi eftir að þróast og stækka, enska bloggið er eiginlega alveg nýtt en mun vaxa eftir því sem fleiri skrifa athugasemdir og ég læri á tæknina ;-)

19. júlí 2008
Í dag var ég með mína fyrstu einkasýningu. Hún var haldin í Eyrarkoti í Kjós. Nánar á bloggunum mínum. Sérstaklega því íslenska.
Þetta var dásamlegur og ógleymanlegur dagur. Takk þið öll sem komuð við á sýningunni og gáfuð mér svo fallegar athugasemdir og yndislegar minningar.
Knús til ykkar allra,
Ragnhildur /Rags

Júlí 2008

Ég vona að allir séu að njóta hins fallega sumars sem við höfum haft hérna á Íslandi þetta árið, svona víðast hvar um landið alla vega.
Það bættist nýr vinabútur í safnið í dag, frá Akureyri. Endilega kíkið á bútinn hennar Ingunnar.
Við hyggjum á langt ferðalag næsta ár að sýna Vinátturefilinn. Ég mun setja inn nánari fréttir um leið og hægt er. Ég get allavega lofað mjög spennandi fréttum... :-)

Maí 2008

Loksins tókst að koma þessari heimasíðu í gagnið aftur!!! Ég vona að þið fyrirgefið þögnina.
Það eru tveir nýjir bútar og þar með tvær nýjar Vinátturefilsvinkonur. Önnur frá Canada og hin frá Botswana.
Nú er næsta skrefið að tengja skannann og setja bútana þeirra inn á síðuna.

September 2007

Nú er liðinn mánuður síðan við vorum á Dalvík. Ég hef fengið þó nokkuð af tölvupósti og fyrirspurnum um Vinátturefilinn eftir sýninguna. Það er alltaf gaman að heyra frá ykkur. Endilega hafið samband, sendið mér tölvupóst á friendshiptapestry@internet.is eða ft (á) internet.is
Ertu að byrja að vinna vinabút?
Ertu að hugsa málið og vilt nánari upplýsingar?
Eruð þið í saumklúbb eða öðrum hóp að vinna saman að vinaverkefni? viljið þið vera í sambandi á meðan á ferlinu stendur?
Ertu með hugmyndir fyrir Vinátturefilinn?
Hvað finnst ykkur um að við störtum netspjalli um handavinnu og vináttu?

Látið heyra í ykkur, verum í sambandi. Ég svara öllum pósti,
bestu kveðjur :-)
Ragnhildur

14. ágúst 2007

Meiriháttar skemmtileg helgi er yfirstaðin. Fiskidagurinn mikli og hin yndislega Vináttukeðja slógu í gegn eins og við var að búast. Dalvíkingar eiga heiður skilinn fyrir frábært starf og ótrúlega vinalega helgi með öllum þessum þúsundum sem heimsóttu bæinn þeirra.

Vinátturefillinn okkar fékk frábærar móttökur, fjöldinn allur af fólki kom og skoðaði og fann vináttuna sem skín í gegnum hvern bút. Það var dásamlegt að fá að hitta allt þetta yndislega fólk.

Mörg ný vináttubönd voru tengd þessa helgi. Ég hlakka til að sjá framhaldið af þeim tengslum sem þarna mynduðust.

Lilja Kristinsdóttir frá Ólafsfirði var ekki lengi að taka við sér. Vinátta er greinilega ofarlega í huga hennar. Það var yndislegt að taka við vináttubút hennar á staðnum. Þetta er bútur númer 261 og er á síðu pieces 261 -
Þakka þér fyrir Lilja, ég var snortin af fallegri vinnu og fallegri hugsun í vináttubútnum þínum.

Nú þegar hef ég fengið póst frá nýjum vinum sem ætla að vera með í starfinu okkar. Ég hlakka mikið til framhaldsins.
Innilegar þakkir fyrir mig og fyrir hönd Vinátturefilsins: Bestu vinakveðjur til ykkar allra!

9. ágúst 2007

Jæja, nú leggjum við af stað til Dalvíkur með Vinátturefilinn. Allt verður klárt á morgun þegar við opnum klukkan sex í Ráðhúsinu.

Það hefur heilmikið af bútum komið inn síðan við sýndum í Fargo fyrir ári.

Ég þurfti að bæta við svarta efnið svo nú er Vinátturefillinn orðinn 6 metrar og 40 centimetrar! 260 bútar! Vináttan og þráin eftir friði er greinileg þegar bútarnir eru skoðaðir. Fegurð og gleði einkennir handbragðið, það er virkileg vináttuorka sem streymir frá reflinum.

Hér sést Vinátturefillinn rétt áður en hann var rúllaður vandlega saman eftir kúnstarinnar reglum og settur í golftöskuna frægu (sjá ferðasöguna frá Boston eftir Fargo ;-).

Í vikunni fékk ég mjög notalega heimsókn frá þremur nýjum vinum.

Hrefna Gunnlaugsdóttir frá Reykjavík, Lucia Calsa frá Mílanó og Sonia Bryant frá London. Við áttum góða stund yfir kaffi og notalegu spjalli, ásamt því auðvitað að skoða Vinátturefilinn gaumgæfilega.
Takk fyrir komuna stelpur! Ég hlakka til að sjá bútana ykkar.
Sjáumst!!

Ágúst 2007

Fiskidagurinn Mikli nálgast hratt! Við erum alveg að verða tilbúin með Vinátturefilinn til að sýna hann.

Það var stór stund hjá okkur á heimilinu að opna Vinátturefilinn og horfa á hann allan í einu. Þvílík hlýja, fegurð og falleg hugsun. Það er eins og maður finni vina og kærleiksorku koma frá bútunum. Allir sem taka þátt hugsa um vináttu á meðan þeir búa til bútinn sinn og það leynir sér ekki.

Það hafa komið margir nýjir bútar síðan við sýndum síðast og þurfti að bæta við efnið! Sem þýðir að Vinátturefillinn er orðinn næstum sex og hálfur meter! Í dag komu tveir bútar í viðbót svo það eru komnir 260 stykki. Alveg frábært að finna hvað þessi hugsun um alþjóðlega vinatengingu á greiðan aðgang að hjörtum fólks. Það gefur manni von um vinalegri framtíð, ekki satt?

Sjáumst í Ráðhúsinu á Dalvík 10.-12. ágúst!

Júlí 2007
Um miðjan júlí komu í heimsókn til okkar Roz and Harold Watnemo og Jeff og Joyce Wold frá Norður Dakóta og Minnesota. Þau gistu hjá okkur eina helgi á leið sinni til Noregs, þaðan sem þau eiga rætur. Roz er annar eigandi hinnar frábæru handavinnuverslunar Nordic Needle í Fargo ND. Nordic Needle er með verslun á netinu og vinalegt vikulegt fréttabréf. Það var í gegnum fréttabréfið sem við kynntumst fyrst nokkrar handavinnuáhugakonur og kveikjan að hugmyndinni um Vinátturefilinn varð til. Í mars í fyrra fórum við: ég og Lárus og heimsóttum Roz og Harold í Fargo og sýndum Vinátturefilinn fyrir fullu húsi dag eftir dag og vakti mikla athygli allra fjölmiðla. Það var einstaklega skemmtileg upplifun að hitta allt þetta vinalega fólk á svæðinu og sumir sem höfðu keyrt allt upp í tvo daga til að koma og sjá!
sjá sýning Fargo og hér

Roz, Harold, Jeff, Joyce, ég Ragnhildur (Rags) og Lárus í litla garðinum okkar í Hafnarfirði. Þetta var yndisleg heimsókn, alveg dásamlega notalegt og skemmtilegt fólk og gott að geta sýnt þeim landið okkar í svona fallegu veðri eins og hefur verið í sumar.

Auðvitað var farið með þau Gullna hringinn ;-)

Roz var búin að tala um ferðina hingað í fréttabréfinu sínu sem auðvitað varð til þess að konur sendu henni búta til að koma með hingað til mín.

Fimm fallegir búta í viðbót á Vinátturefilinn. Ég er að festa þá á refilinn núna ásamt öðrum bútum sem hafa bæst í síðan við sýndum síðast. Nú eru komnir 258 bútar! Sjá alla bútana á bútasíðunum með því að ýta á hvern bút kemur stærri mynd af honum. Athugið að það eru 20 bútar undir hverjum tengli. Semsagt fullt, fullt af fallegri handavinnu og listaverkum. Og auðvitað verða allir þessir bútar á Vináttureflinum sem við sýnum í Ráðhúsinu á Dalvík 10. - 12. ágúst 2007 (Fiskidaginn Mikla) í tengslum við Vináttukeðjuna.

Það var mikill heiður og skemmtilegt að fá þau í heimsókn.
Takk kærlega fyrir komuna!

Júlí 2007

Við fengum góða heimsókn frá Ohio á dögunum. Carol Jean og Ron Abraham komu við hjá okkur á leið sinni umhverfis landið. Carol hafði saumað fallegan bút fyrir Vinátturefilinn og kom með hann, ásamt því að skoða Vinátturefilinn sjálfan auðvitað! Svo það bætist stöðugt í refilinn og verður gaman að sýna hann á Dalvík á Fiskideginum mikla.

Hérna höldum við á bútnum hennar, sjá nánar á pieces 240 -

Við áttum mjög skemmtilegan eftirmiðdag með þeim hjónum Carol Jean og Ron.
Takk fyrir komuna!

Júlí 2007

Nýjustu fréttir!!!

Við munum sýna Vinátturefilinn í Ráðhúsi Dalvíkur í tengslum við Vináttukeðju Fiskidagsins mikla, helgina 10. - 12. ágúst 2007.

Endilega verið með og sendið inn bút (sjá gátlista) Verkefnið er opið öllum, án nokkurra landamæra! Gerum heiminn vinalegri, minnum á vináttuna, innst inni viljum við öll vera vinir, ekki satt?

Nánar á næstu dögum, fylgist með undirbúningnum hérna fram að sýningu!
Nú þegar eru komnir fleiri bútar víða að, m.a. Ohio, Nýja Sjálandi og fleiri stöðum. Ég mun setja þá inn á síðuna eins fljótt og auðið er. Skoðið bútana sem komnir eru á Búta síðunum