Barnaland Nínu Þorbjargar

Tvö atriði hafa átt sér stað í flokki skammarlegra hluta undanfarið:
1) Erum enn á nagladekkjum. Eigum á hættu að vera sektuð um 5000 kr., Á HVERT DEKK, ef löggan nær okkur. Mætti halda að þetta virkaði sem hvatning til að drífa sig á dekkjaverkstæðið. Nei nei. Okkur finnst við líka vera í frekar sérstökum aðstæðum...setjum venjulega ekki naglana undir fyrr en eftir áramót, svo með réttu eigum við fullt af naglatíma eftir. Áfram naglar.
2) Erum með svæsnasta garð mannkynssögunnar. Í þessum garði er úrgangur alls konar dýrategunda, njólar, fíflar, sóleyjar, dagblaðasnifsi, sígarettustubbar, rakettuafgangar, afklipptar trjágreinar, dauðar trjágreinar og ógeðslegasta gasgrill á jarðkringlunni sem hefur ekki verið notað í a.m.k. 5 ár (og nágranninn reyndar á). Tók mig til og sló garðinn og úðaði eitri á allt illgresið. Úðaði reyndar yfir allt ruslið líka (smá klikk í forgangsröðuninni) þannig að það er alveg ómögulegt að týna þetta eitraða rusl. Nú er garðurinn fullur af dauðu illgresi og eitruðu rusli. Hef engan tíma til að uppræta hræin og líður bara illa að horfa upp á eyðilegginguna sem ég hef valdið. Finnst nefnilega fíflar lúmskt skemmtilegir...gulir og sterkir. Verst að nærliggjandi garðaeigendur deila ekki þessari hrifningu minni.
Önnur mál:
Nína Þorbjörg er eldhress og talar og talar, hoppar og skoppar. Hún er farin að taka bangsa og snuð með sér allt sem hún fer og er alveg eyðilögð ef annað hvort glatast. Lenti í verulegri krísu um daginn þegar hún hugðist snæða banana, auk þess að halda í bangsa og tvö snuð. Þetta reyndist ekki lífeðlisfræðilega mögulegt vegna skorts á höndum og olli það gríðarlegum vonbrigðum.

Skyndilegt málæði búið að grípa um sig....gleymdi bara að minnast á þessa agalega fínu Nouvelle Vague tónleika sem ég fór á um daginn. Þetta gefur meira að segja tilefni til að setja inn mynd og ekki seinna vænna, bloggið er farið að líta frekar niðurdrepandi út.
Tónleikarnir voru sem sagt mjög skemmtilegir og hljómsveitin seyðandi á sviðinu, jafnvel þótt þetta hafi verið voðalega smurt og æft og allt það. Þekkti mjög marga á þessum tónleikum, þannig að þetta var farið að minna á gömlu góðu vísindaferðirnar eða bara menntaskólaball. Mjög gott kvöld.
Fyrst maður er kominn í dægurmenningardeildina mætti mæla með ítölsku dögunum í Ríkinu, Panś Labyrinth og Eymundsson í Austurstræti (var bara að sjá búðina eftir endurbæturnar og hún er hrikalega flott).
Svo sakna ég ca. 7.348 bleikra snuða, bæði úr silikoni og latexi. Finnandi vel þeginn. Skil ekki hvernig stendur á því að við erum ekki veltandi út úr íbúðinni okkar á stórri snuðskriðu.

Fagnaði "megrunarlausa deginum" með því að borða gulrótarköku í hádegismat og súkkulaði í kaffinu. Gaman að hafa einu sinni afsökun fyrir lífsstíl sem ég stunda annars alla daga vikunnar. Sem dæmi um téðan lífsstíl er nýjasta æðið sem Ólöf kynnti fyrir mér um daginn ("takk" Ólöf) þ.e. kaffisúkkulaði með súkkulaðiespresso. Beint á eftir hádegismat. Hrikalega gefandi.
Annars er það helst í fréttum að ég er byrjuð að kynna mér sænska tungu, enda í bígerð að flytja einhvern tímann þangað til að ljúka námi (sem er nú þegar búið að vera í gangi s.l. 9 ár). Er herfileg í sænskunni eins og er, sænska fyrir mér er bara danska með "inte" í staðinn fyrir "ikke", "jætte bra", "jobba, "jogga" og "huuuuus". Enginn Svíi skilur mig og ég skil þá ekki heldur. Lærði svakalega flott orð af sænskri hjúkku um daginn "kandidaaats schjeeerl", sem þýðir víst kandidatsæðar (eða æðar sem er auðvelt að stinga í) og er víst ekki skrifað svona (kemur á óvart, ekki satt).
Nína Þorbjörg er alltaf að bæta við sig orðum og er farin að læra að stjórna almennilega á heimilinu. Kann að heimta vatn og nammi (sem er allur matur, sérstaklega rúsínur), hún kann líka að heimta að fara út (kemur þá með húfu og flíspeysu og segir "út"). Hún hefur mjög sérkennilegan matarsmekk, borðar helst bara banana, pasta, rúsínur, lifrarpylsu og harðfisk, líka ólívur og alla osta. Ánamaðkar eru líka kræsilegir, en alls ekkert annað (fiskur og kjöt??? Ullabjakk).
Spurning dagsins(rúsínan í lifrarpylsuendanum): Skil ekki stjórnmálaflokka sem slá um sig með loforðum um að hækka skattleysismörk, eyða biðlistum, byggja fullt af hjúkrunarrýmum, gera alla skólagönguna og leikskólann ókeypis, gefa allar skólabækur ókeypis, hafa heilbriðgiskerfið ókeypis, stórbæta samgöngur....og síðan er ekki orð um það hvaðan peningarnir eiga að koma! Eins og það séu stórar fúlgur á glámbekk úti um allt sem engin fattar að nota í velferðarmál heldur hafi bara til skrauts eða til að baða sig upp úr. Sömu mönnum er hætt við að vilja stöðva alla stóriðju...en þaðan virðast einmitt peningarnir koma. Kannski það sé ómældur auður fólginn í eldfjallagarði og fjallagrasatepokum. Kannski?